政壇：搞搞政：吳得掂缺席公聽為慶生
立法會教育事務委員會喺舊年底特別舉行全港性系統評估（TSA）公聽會，但教育局局長「吳得掂」吳克儉就以「私人理由」缺席，畀人鬧爆，最後仲被人踢爆原來為咗去日本賞紅葉，懶理教育問題。佢回港後出席公開活動時仲唔避嫌分享遊日心得，心得多到幾乎可以出版日本攻略，但佢就一味用「私人嘢」、「私人理由」做擋箭牌，唔肯透露係咪曾去日本賞紅葉。
日本紅葉年年都有，吳得掂亦可選擇喺公聽會前後時間出遊，點解堅持喺公聽會當日遊日賞紅葉？幾經打探之下，近日先發現原來公聽會當日、即係十一月二十九日，正正係佢六十三歲生日，仲計劃去日本賞紅葉慶祝生日，終於真相大白嘞！
其實，生日外遊大有人在，所以吳得掂生日請假都係人之常情，如果做官凡事要以工作同開會行先，咁請班尊貴立法會議員都唔好雙重標準，切勿唔開會請假外遊喇，更加唔好借公帑外訪當旅行。
今又上京訪教育部
但衰在吳得掂外訪當「食生菜」，單係舊年就外訪咗十五次，平均每月就外訪一次，加埋放假都唔知離港幾多次喇，所以就算當初坦誠告知大家自己因為生日而請假都無用，相信無人可憐。話口未完，政府尋日又發出新聞公報，指吳得掂今日又去外訪喇，但今次係上京同國家教育部、北京市教育委員會官員進行交流，唔知道返港後，下次又幾時再起行呢？
