政壇：鄉事多磨 張學明入廠
新界鄉議局正值多事之秋，對外有「套丁」案爭議，對內再有領導層入院！繼鄉議局前主席劉皇發舊年疑因病重入院，至今仲缺席所有公開場合同會議，原來副主席兼行政會議成員張學明上星期亦因急性膽囊炎，需入院做割膽手術。
張學明上星期因急性膽囊炎，要入院割膽。（資料圖片）
上周有網媒報道張學明早年涉嫌套丁圖利，佢事後仲罕有缺席鄉議局上周二嘅大會，未現身主持會議，令套丁謠言更甚囂塵上。但聽聞張學明唔係有意避傳媒，係因為前一日突然腹部絞痛要送院檢查，先發現原來生膽石。
張學明尋日喺電話向記者證實，上周一腹部突然劇痛，檢查後發現「個膽好多石」引發膽囊炎，需進行割膽手術，尋日下晝先正式出院，所以無奈缺席上周二鄉議局會議同前日嘅行政會議。
記者喺電話聽到張學明講嘢仲係氣若游絲，相信佢仍需休養一段時間。其實佢已向鄉議局請假至下月十五日、即年初八，所以可能出席唔到年初七（人日）鄉議局團拜同沙田馬場鄉議局盃賽。農曆新年將至，發叔過往大年初二都會到沙田車公廟為香港祈福，睇怕今年接棒負責求籤嘅鄉議局主席劉業強都要為局方上下多多祈福至得喇！
