政壇：葉劉晒陳年國貨皮草

呢幾日天寒地凍，大家都添衣保暖，但立法會議員葉劉淑儀尋日就喺會議廳外當眾脫下棗紅色皮草大衣，但唔係想話自己唔怕凍，而係透露件皮草係媲美歐洲貨嘅優質國貨。

葉劉淑儀喺會議廳外把棗紅色皮草脫下，透露係優質國產皮草。

葉劉身穿一件棗紅色皮草大衣到立法會開會，透露皮草係十多年前任職保安局局長時喺哈爾濱度假時購入，件皮草係中國製造，價值一萬多元人民幣，可以抵禦零下二十度寒冷天氣。佢讚皮草禦寒能力高，媲美歐洲貨，仲當眾除低皮草大衣，力證係「真國貨」。

佢又話近日氣溫急降，外出落區時都冇着皮草，簡直係「凍到死」，所以即刻搵番件皮草出嚟着。對於着皮草或惹嚟環保團體批評，佢就話皮草係嚟自人工飼養嘅動物，唔係野生動物。