話時話，立法會議事質素每況愈下，有人批評議員開會前唔做功課，講嘢前又唔經大腦，搞到嚴肅嘅議事堂成日鬧出笑話。立法會尋日開會時，有議員關注特首梁振英表示香港唔排除退出聯合國《禁止酷刑公約》一事，同埋銅鑼灣書店負責人李波失蹤事件，新民主同盟嘅范國威就亂咁噏，質疑港府密謀退出公約係同佔領行動有關，又將免遣返聲請同單程證類比，到底佢知唔知自己噏乜呢？
保安局局長黎棟國尋日喺立法會回應議員有關酷刑聲請嘅口頭質詢時，范國威忽然發表偉論，指政府針對酷刑聲請，但對同為移民政策嘅「單程證」置若罔聞，質疑係因為聯合國酷刑公約委員會早前表明，會就港府喺佔領行動期間涉嫌濫用武力進行獨立調查，所以「存心報復」威脅退出公約。黎棟國對於范國威嘅言論不明所以，強調單程證係香港根據《基本法》推行頗長時間，同酷刑聲請係兩碼子嘅事，唔希望將兩者混為一談。
查實，范國威將酷刑聲請同「單程證」扯埋一齊嚟講，根本就係想偷換概念、混淆視聽，咁做法唔單止反映佢「低招」，簡直係廢噏當秘笈。
網民嘲譚耀宗問題廢
其後問到有關李波失蹤事件上，建仔嘅「譚Sir」譚耀宗亦同樣語出驚人，譚Sir問：「如果現時有啲香港永久性居民，用非法、非正常途徑出境，本身有冇違法？」有網民話，佢問一個非法行為有冇違法，就等同問「陳生你貴姓」一樣，一係無用腦，一係明知故問，取笑佢嘅提問毫無意義。
不過，黎棟國面對無厘頭問題仍然認真作答，話如果有相關人士並冇經正常出入境渠道離開香港，當局會就個別案件判斷係咪違法，至於李波事件就暫時未能判斷。
第一手消息請下載on.cc東網
