來來來，金融地產出嚟拜個早年。

揮春咁闊，除咗學似長實地產高級營業經理何家欣咁拎住，仲唔知可以貼喺邊？

阿「星」同阿「展」快高長大，唔經唔覺就十年。

先係星展銀行利是封對金童玉女，阿「星」同阿「展」大個可以出嚟搵錢喇！

小朋友個樣就話年年唔同，一年大過一年，點知「快高長大」呢四個字，同樣可用喺利是封身上，唔係講利是封個Size喎，即係點？話說星展利是封上面有對小朋友，囡囡叫阿「星」，囝囝叫阿「展」，佢哋○七年第一年喺利是封上出現時，仲係BB仔BB女，依家已經十歲，拎住金元寶同大家拜年。阿「星」同阿「展」大個咗，今年仲有價有市。發現有人將佢哋今年個利是封放上網賣，十五蚊有八個，包埋郵費。

農曆新年點可以冇揮春。話說長實地產旗下元朗新樓盤世宙特意準備自家製揮春，仲用個盤名大玩食字「一世利宙」，送畀春節期間入市嘅買家。

揮春設計一反傳統，係用綠色做主調，仲用埋樓盤名大玩食字，由「一世利宙」開始，到「一元復始」、「舉世無雙」、「大吉大利」、「宇宙最強」，全部齊晒。話時話，咁闊嘅揮春，可以貼喺邊呢？

第一手消息請下載on.cc東網iPhone/iPad/Android/Windows Phone Apps