城中鏡：愛駒靠德住
近排香港經濟步入冰封期，資金流走亦連累港股及港匯大跌，令唔少人荷包大縮水。早前喺馬場見到中華廠商聯合會副會長Allen史立德同「耳機大王」富士高實業主席Johnny楊志雄，兩人不約而同對經濟前景好悲觀。Allen呻話，佢買咗唔少股票收息，點知股價都蝕咗一大截，擔心上市公司生意難做，下一步可能減少派股息，到時股民就真係雪上加霜喇！
史立德（右）愛駒爆冷跑第三，佢同太太史顏景蓮（左）開心到極。
葉愛愛（右）開年後將返新加坡探媽媽，旁為丈夫劉業強。
楊志雄指歐美經濟復甦冇想像中穩固。
Allen話依家係低息時代，若將閒錢存放喺銀行確係幾消極，所以都買入唔少高息藍籌股作為長線投資，股息有五、六厘咁多，但係今次大跌市，佢都「唔見咗好多」，坐晒艇喎，仲估計股市跌勢仲未完。不過，當日佢同太太史顏景蓮名下愛駒爆冷跑第三，帶挈一班朋友贏咗錢，個個都開心晒。
Johnny就話最近好多業界朋友都呻生意差咗，佢盤耳機生意都唔例外。原本第三季係傳統落訂單嘅旺季，但係舊年推遲到第四季先至有柯打，反映歐美嘅消費者信心唔夠，經濟復甦步伐仍然未穩固。
葉愛愛留港過新春
同場仲見到新界鄉議局主席劉業強同太太Judy葉愛愛。Judy係新加坡人，嫁咗嚟香港近二十年，唔知佢有冇特別掛念家鄉？Judy笑笑口話好習慣香港生活，唯一掛住嘅係媽媽喎，真係孝順女。Judy仲話農曆新年就到，佢會留喺香港同家人一齊過，開年後先至返娘家探媽媽，諗起就開心。
