政壇：上海迪園 單雞睇唔上眼
上海迪士尼樂園將喺今年六月十六日開幕，白鴿黨立法會議員「單雞」單仲偕係出名嘅迪士尼迷，加上佢喺六月十五日生日，可以順道去慶祝，但係佢就表明對上海迪士尼冇乜興趣，話聽唔慣啲普通話版嘅迪士尼名曲喎。
單仲偕係出名嘅迪士尼迷，但就對上海迪士尼樂園冇乜興趣。
單雞透露，全世界現有嘅迪士尼樂園佢都去過晒，有啲仲唔只去過一次，例如佢度蜜月嗰陣就去咗日本迪士尼，囝囝出世時就去加州迪士尼，但係佢個人就最鍾意佛羅里達州嘅迪士尼，因貪佢夠大夠好玩。
佢又話兩個仔尤其鍾意睇迪士尼名著《獅子王》，細個嗰時幾乎日日放學都睇，前後睇咗超過一百次，搞到當年盒錄影帶連磁帶都斷埋，但依家佢哋大個咗，口味已經轉晒，之前一家四口去咗倫敦睇歌劇版，一張飛要四百幾蚊港紙，佢話覺得好貴，但其實同迪士尼門券差唔多。
