政壇：單拖赴中聯辦酒會 曾蔭權被當透明
中聯辦尋晚喺灣仔會展舉行年度新春酒會，並廣邀城中政商界人士出席，但想不到連捲入連串瀆職行為案件嘅前特首曾蔭權爵士都有份獲邀。不過，久未出席公開官式場合嘅曾蔭權卻姍姍來遲，喺酒會正式開始前數分鐘先喺警方保護要人組（G4）人員陪同下入場，更罕有「單拖」現身，全程未見太太曾鮑笑薇同行，而且遭冷待同被當「透明」，認真寒天飲雪水。
曾蔭權白髮蒼蒼，顯然最近未有染髮，即使結上鮮色煲呔仍難掩老態。
G4護送 快閃離場
曾蔭權喺酒會開始後，跟隨中聯辦主任張曉明嘅大隊喺較後排位置，腳踏紅地氈進場，惟佢不但未有再次獲邀上台祝酒，只能同其他賓客擠喺台下觀看儀式，現場所見佢白髮蒼蒼，髮線向上移，顯然最近未有染髮，即使結上紅藍白鮮色「煲呔」，仍然難掩老態。
然而，形單影隻嘅曾蔭權喺酒會儀式結束後未有留下同其他賓客寒暄，前後只逗留約半小時即喺G4護送下急急腳「快閃」離場，唔少賓客眼見前特首離開都當佢「透明」，只有幾個人同佢客套握手打招呼。喺寒風凜凜嘅夜空下，曾蔭權全程孤身隻影可謂冷上加冷。
