各黨派陸續就新一屆立法會換屆選舉展開內部提名同甄選程序，當中最令人意外嘅係「七警案」主角、本身亦被控襲警罪嘅激進社工曾健超，亦喺公文袋內部報名參選。加上同屬激進派嘅大律師兼立會前議員陳淑莊或重返議會，而該黨喺違法佔領行動後吸納咗大批「傘兵」加盟，顯示喺創黨時標榜中產專業、有多名資深大律師坐鎮嘅公文袋，勢進一步激進化，政綱立場隨時由維護法治，變破壞法治。

由於公文袋冇規定黨員報名時須揀選邊個選區或任何功能界別，因此暫時未知曾健超係想參加地區直選，抑或有意出戰社福界功能界別，挑戰同屬泛民陣營嘅工黨現任議員張國柱。但曾健超早前參選社工註冊局時以第二高票當選，而第一高票嘅邵家臻已表明唔會挑戰曾患病嘅張國柱，估計曾健超參選社福界嘅機會較高。

陳淑莊出選香港島

至於參選區議會落敗、喪失「超級區議會」選舉入場券嘅現任立會議員陳家洛，一如所料被迫放棄角逐連任，將香港島直選嘅出選名額交還畀當年幫佢抬轎嘅陳淑莊。早前已表明唔會連任嘅黨魁梁家傑亦無報名，預計由身為飛機師嘅譚文豪接棒出選九龍東，而新界西現任議員郭家麒同九龍西現任議員毛孟靜都有報名角逐連任；新界東則由大律師楊岳橋接替已退黨嘅湯家驊出選。

該黨資深荃灣區議員陳琬琛同新當選嘅年輕東區區議員鄭達鴻，亦有喺黨內報名參選立會，陳琬琛有意出戰公文袋上屆無派人參選嘅「超級區議會」及新界西直選；而鄭達鴻則出戰香港島直選。不過，無論該黨最後具體點樣擺位，年輕激進勢力抬頭，少數溫和派被踢走嘅大局已定，香港人係時候綁定安全帶，以便應對未來幾年嘅政治同法治動盪喇！

第一手消息請下載on.cc東網iPhone/iPad/Android/Windows Phone Apps