政壇：民協年輕化等發落
話說民協日前換屆，由加入民協十六年嘅女將莫嘉嫻擔任主席，副主席則由譚國僑同施德來出任，新一屆中委成員平均年齡為四十一點五歲，比上屆年輕超過三歲。莫嘉嫻指民協年輕化係要回應市民求變嘅聲音，佢哋亦有好多後生仔想出戰九月立法會選舉，但對部署就大耍太極，皆因等埋該黨「靈魂」、立法會議員KK馮檢基嘅參選去向先可作決定，究竟民協係咪想年輕化呢？
舊年區議會角逐連任失敗、痛失俗稱「超級區議會」嘅區議會第二功能界別入場券嘅KK，早已明言唔會翻兜「老巢」九龍西，咁嚟緊立會選舉最終會落戶邊度呢？莫嘉嫻竟然話唔知道，笑稱KK地位超然，反叫記者問番KK。而施德來嘅參選去向亦都受KK影響，明言只想出選九龍東選區，但奈何未知KK嘅決定，所以只能夠繼續等候發落。睇嚟已年輕化嘅民協，依然有唔少掣肘。
莫嘉嫻「為港砌到盡」
莫嘉嫻解釋，民協日前選出主席後，仍然約緊下次會議時間去選秘書長、司庫等職位，所以未咁快定立會選舉名單，而根據黨程序，立會名單要等到六月由中委確認先得，即係有排先公布喇！但佢透露，民協依然以爭取四席為目標，分別係超級區議會、新界西、九龍西同九龍東，而黨內都有唔少年輕人有興趣參選立會，但係已表態嘅唔多。新任青年民協召集人何啟明就表明有意參選超級區議會，仲話目前只有佢一人參選添！須知道立會選舉好難打，一早就要落區工作，如果下下等埋KK去向同個黨確認先落區宣傳，睇怕都係咁先喇！
雖然講立會部署時「就住就住」，但莫嘉嫻講述民協未來動向就暢快得多。佢話自己作為黨內少數中生代，出任主席只為接實前輩嘅經驗同成績，待新生代坐穩領導層後就會交棒，明言唔會長做主席。佢又認為現時中央政府同特區政府都唔願意同泛民傾，所以未來要「為香港砌到盡」，要靠「砌」去帶出香港人聲音。而民協未來亦會向其他泛民政黨借鏡，多使用網絡作宣傳工具。
