「恒生新抱」Anina何倍倩早前創辦瑞士護膚品牌Zensation，並順利喺美國大百貨公司上架，一一年更獲北京頒發傑出女企業家獎，近日佢突然發覺自己脫節，擔心跟唔上社會，決定修讀商科博士自我增值，「睇住社會變咗，慢慢發覺自己嘅網上銷售生意愈嚟愈好，人嘅消費模式唔同咗，好多客鍾意透過上網同email問嘢，開始覺得自己有少少脫節，覺得自己樣樣都甩甩哋。上堂聽唔明同學嘅言論，我唔明就係甩，同小朋友讀書先發覺學校加入咗好多電腦元素，又甩，我第一日上堂，之前專登買咗本好靚嘅記事簿同筆，入到班房全部人都用iPad上堂，嗰刻好驚，覺得自己真係脫咗節。」

何倍倩

佢話曾經睇過一篇文章，話當成年人覺得年輕人做事急進又鹵莽時，代表前者已經脫節，令佢印象深刻，佢仲擔心將來同仔女有代溝，故今年修讀咗著名學府英國Saint Martin's嘅「Arts and Culture Enterprise」博士課程，盼從中取得自信。呢個係一個集合商業管理、文化同藝術嘅課程，課程喺香港同英國同步進行，每周喺屋企以視頻上課，而每隔三周，英國嘅老師就會飛嚟香港密集式授課。

第一手消息請下載on.cc東網iPhone/iPad/Android/Windows Phone Apps