城中鏡：隆鼻爭先
沙田馬場尋日舉行博愛盃賽事，博愛醫院主席Winnie譚姜美珠、副主席彭少衍同李柏成等董事局一班高層齊出動，而善德基金會主席董吳玲玲亦去撐場，佢老公董中浩名下愛駒「翡翠紅星」尋日出賽，結果輸咗個馬鼻跑梗頸二，Winnie開玩笑教董太帶愛駒去韓國打美容針，整高個鼻咪得囉，逗到董太哈哈笑。
譚姜美珠（中）帶笑教董吳玲玲（右）帶愛駒打美容針。左為博愛總理王雲仙。
吳俊華（左起）出任香港非洲商會主席，林群同林賢奇都為佢感高興。
梁青華（右）同梁天富係相識多年嘅好友。
身為慈善團體主席通常都忙到飛起，Winnie亦唔例外，仲搞到第一次入博愛醫院添！事關早前佢同博愛同事到廣西訪問，唔小心扭親隻腳，事後服食止痛藥導致敏感，結果要入醫院大檢查，前日先好番晒，可及時出席尋日嘅活動。Winnie笑稱，今次係佢首次使用博愛醫院嘅服務，結果？梗係好滿意喇！
轉頭見到香港鐘表業總會前主席梁青華、博愛前副主席James吳俊華、林賢奇同總理林群等人。梁青華同博愛總理梁天富相識多年，所以捐出一隻價值二十幾萬靚錶做獎品，仲親自入場支持，相當有心。
吳俊華帶頭撐「非商」
至於喺非洲投資農業嘅James，最近牽頭成立「香港非洲商會」，並出任創會主席。James話非洲係「一帶一路」嘅其中一站，希望成立商會配合歷史機遇，協助商界打開非洲之門。佢仲趁機為非洲國家抱不平，認為香港人以為當地好窮，治安又唔好，其實非洲有幾十個國家，當地經濟發展亦唔錯，希望將來商會做多啲正面宣傳，令港人對非洲改觀。
