政壇：公大課程難 校長遇投訴
外界流傳公開大學「入學易、畢業難」，公大校長黃玉山早前出席活動時自爆跑馬拉松比賽時，遇到有名人嘅太太向佢投訴，話喺公大讀教育碩士要考試好慘，而佢老公喺另一間大學同樣讀教育碩士，似乎冇咁大壓力，又唔使考試喎。
公開大學校長黃玉山
黃玉山話不時遇到有人當面投訴課程難，而且多課堂、又多功課同考試，佢解釋，公大要獲社會認受，課程都比較嚴謹，而考試考得深嘅原因係八大院校中，有兩百多個教職員幫公大做校外評核，但佢其後話都會想辦法，諗吓點樣令課程靈活啲。
佢又話自己未出任公大校長前，曾以為公大全職本科生公開試成績較弱，較難搵工，但做校長後發現其實公大生就業率都唔錯，有八成六，佢相信與同學特別勤力、搵工又務實有關。
