政壇：曾德成歎世界 無意重出江湖
話說民政事務局前局長曾德成自舊年七月「被免職」後，一直都冇乜喺公開場合現身，除咗畀記者「野生捕獲」佢同老婆去日本旅行外，就係喺社交網站被發現去行山。但尋日喺教育中心開幕時，曾德成就罕有現身做主禮嘉賓。事緣教育中心董事長謝尚偉喺曾德成任內，出任民政事務局香港青年服務團團長。
曾德成（中）享受退休生活，暫無意重出江湖。
趁機問曾德成會唔會重出江湖？佢就反問乜嘢叫重出江湖。咁例如九月時會唔會轉戰立法會選舉？佢笑笑口話未有打算，仲話離開政壇後，都係去吓旅行、休息吓，仲會讀吓書喎。
講起立法會泛民議員不停拉布，將各項法案審議進度有咁慢拖咁慢，搞到曾德成哥哥、即立法會主席曾鈺成都好頭痕，早幾日仲病到返唔到立法會主持大會添！佢就話曾鈺成已經好番喇，仲話絕對相信弟弟可以處理好議會嘅拉布問題。問到對新一份施政報告有乜嘢評價？曾德成就形容自己「不在其位、不謀其政」，所以唔方便評論。
