政壇：陳恒鑌偷歡 獨自去追霜
大帽山罕有地結霜，唔少市民都去「追霜」，連立法會議員Ben陳恒鑌都係其中一分子，尋日凌晨四時許佢駕車聯同友人上大帽山，就冇預太太同囡囡隨行。
陳恒鑌甫到大帽山道就遇上封路，未能登頂賞霜。（互聯網圖片）
阿Ben透露，太太知悉佢準備出發賞霜時，一度反問「乜我冇得上呀」，其後又建議阿Ben帶埋囡囡賞霜，最終阿Ben以太太懷孕同擔心囡囡未必捱得住嚴寒天氣為由，決定一支公同友人「追霜」。
阿Ben又自爆，原本打算帶兩箱熱維他奶上大帽山派街坊，殊不知去到大帽山道一帶，就遇上封路無得再往上前進，最終兩箱維他奶惟有留番自己飲。不過，即使未能登頂，佢對於人生首次見到落冰粒落到撻撻聲，有啲落到佢塊臉就變成水，感到非常難忘。
