俗稱「網絡廿三條」嘅《2014版權（修訂）條例草案》成為泛民議員喺立法會拉布嘅主戰場，由舊年十二月至今，總共喺大會商討三次，流會咗三次，都只係勉強完成二讀，離三讀通過仲有一大段距離，搞到主責呢個草案嘅商務及經濟發展局局長Greg蘇錦樑頭痕之極。

政務司司長林鄭月娥曾放話，會同立法會主席曾鈺成商討，為草案「製造最大空間、預備最長時間」審議。建制派消息人士透露，所謂嘅「最大空間」，係政府初步傾向考慮延長開會時間，除咗考慮延長每日開會時間之外，亦考慮喺公布財政預算案或內地召開「兩會」期間延長大會。過往每逢二月底發表完預算案後，立會大會即結束，三月初唔少議員要上京參加人大政協會議，立會亦只會星期三開大會。故政府惟有搵到邊日有空位，就喺嗰日加會。據聞政府暫時仲未考慮通宵開會，可能係擔心就算通宵開會，都唔係個個建制派捱到啩？

除咗加會，政府仲諗到一個絕招，就係將臨時撥款決議案押至最後先審議，將臨時撥款同版權法草案進行綑綁。事關以往激進泛民就預算案拉布可以拉到五月尾，如果一日版權草案未通過或唔撤回，一日政府都攞唔到臨時撥款，即係四月一日新財政年度即刻冇錢用。咁做或令泛民唔敢拉布到底。但咁樣綑綁係一着險棋，因為一一年立會真係試過否決議案，到時臨撥如果真係趕唔切通過，政府同財政司司長「鬍鬚曾」曾俊華隨時引火自焚，兩敗俱傷，唔知點收科？

第一手消息請下載on.cc東網iPhone/iPad/Android/Windows Phone Apps