前年工黨李卓人同社民連梁國雄兩名立法會議員爆出捐款醜聞，當中李卓人竟將捐款「袋住先」，更被指涉嫌私吞利息。立法會議員個人利益監察委員會亦都就事件展開調查，最後裁定投訴不成立。事件餘波未了，有團體就曾發起遊行抗議，希望廉政公署就事件進行調查。最近立法會會計界議員Kenneth梁繼昌就申報咗一堆銀行回贈嘅超市禮劵，價值一千六百五十蚊。唔知Kenneth係咪怕捲入捐款醜聞而申報呢？

平時議員都會申報出席公開活動之後獲贈嘅物品，例如刻咗名嘅紀念品，但就好少見超市禮劵。據Kenneth所申報嘅內容，呢批禮劵係分兩次送出，第一次喺上年十月，價值一百五十蚊；第二次喺今個月，價值係一千五百蚊。點解銀行會送禮劵呢？事緣Kenneth喺上年轉咗用網上付款方式，幫辦事處嘅職員交強積金供款，所以銀行回贈超市禮劵，以答謝Kenneth使用網上服務。Kenneth話其實佢喺利益申報上會盡量做得透明啲，等公眾可以更加清楚了解。佢亦都打算將呢堆超市禮劵用嚟做員工福利，畀辦事處職員買吓零食喎。

議助MPF亦涉公帑

咁Kenneth會唔會鼓勵其他議員照辦煮碗咁做呢？佢就話要視乎幫議員做申報嘅助理對金錢嘅價值觀，佢自己就一定會申報。

其實立法會議員助理嘅強積金都係由公帑支出，呢次Kenneth所收得嘅回贈既然係因強積金而起，所以都同公帑有關連，今次都算佢夠清醒，識得申報，免得來日夜長夢多。唔知其他議員會唔會有樣學樣，做得嚴謹啲，免得日後墮入利益申報醜聞漩渦呢？

第一手消息請下載on.cc東網iPhone/iPad/Android/Windows Phone Apps