城中鏡：李建英臨退續撐電子票
金管局金融基建助理總裁Esmond李建英今年八月就退休，但佢對金管局仲非常咁上心、十分之肉緊。Esmond尋日出席銀通P2P過數服務記者會，亦不忘自讚金管局有份搞嘅電子支票，每讚銀通P2P一句，就補多句電子支票有乜好，總之把握機會勁Sell上月推出嘅電子支票。
李建英好落力Sell金管局有份搞嘅電子支票。（資料圖片）
Esmond唔止得個講字，仲準備埋證據說服大家。佢話電子支票平均每筆過萬蚊，同銀通P2P嘅兩日最多三千蚊，明顯Market（市場）唔同，故兩者無競爭，各有各做，仲話香港支付市場大把空間發展咁話。講講吓，佢仲順手幫金管局高層專欄《匯思》賣埋廣告，話下期就係正正講流動支付嘅保安添！
