城中鏡：樹根花生餵象哥
尋日立法會恢復二讀辯論版權修訂條例草案，泛民議員繼續拉布，全日「朝十一晚八」會議合共有二十七次點算法定人數，共嘥約四小時會議時間，一班建制派議員為免流會，都坐定定留守會議廳，拉布下嘅眾生相極富娛樂性，其中建仔鍾樹根忽拎出一大包花生同黨友分享，仲將花生餵入黨友、進出口界議員「象哥」黃定光口中，不經意流露hehe本色。
鍾樹根（中）突然餵黃定光（右）食花生。左為陳克勤。
葛珮帆自爆「偷運」花旗參茶入內提神。
張宇人稱受拉布影響，食飯漏帶銀包險要洗碗「填數」。
張宇人自爆食飯未找數
舊年十月立法會復會至今前後三次流會，泛民仲未有迹象會停止點人數拉布，建制派為反拉布就各師各法，拎一袋二袋入會議廳打長期戰，建制派議員EQ葛珮帆笑稱，自己「偷運」咗大豆茶同花旗參茶入會議廳，話大豆茶補血、花旗參茶提神。另一議員Ann蔣麗芸就話若遇上唔想聽到嘅發言，就會戴耳機聽音樂；保險界議員陳健波仲表明，有打算盡量唔離開會議廳，故帶咗電腦、充電器同大量文件去處理。
泛民議員幾乎五分鐘點一次人數嘅頻率，亦令建制派要諗計點「醫肚」，其中工聯會KK黃國健大嘆一餐飯分三次食，驚長遠有腸胃問題；飲食界議員張宇人自爆因多次往返餐廳同會議廳，漏帶銀包無錢找數，好在立會餐廳願意爭住先，否則差啲就要洗碗「填數」，佢否認食霸王餐，只係遲少少「找數」，又講笑話自己依家有個日本名，叫「騰上騰下」。
此外，商務及經濟發展局局長Greg蘇錦樑會後都「搞gag」，話尋日係大寒，出面非常寒冷，而版權法亦進入咗「冰封時期」，但大寒後就係立春，盼可畀市民一啲希望同溫暖，唔知泛民議員能否心領神會阿Greg嘅意思？
