SUN揭秘：女承母業 胎毛筆傳藝
已踏入退休年齡的胎毛筆女店主徐雲芳，月初遭賊人掠去家中超過二百萬現金及一批約值十萬元的金器，畢生積蓄瞬間化為烏有。不過，幸有女兒願意放棄夢想，接手業務，希望憑努力賺取下一個二百萬。文：唐芷欣/圖：甘偉倫
張璦雲（左）指，身為大家姐，有責任接手家業，不希望胎毛筆失傳。右為徐雲芳。
未經修剪的嬰兒頭髮，可令筆鋒更尖。
除胎毛筆外，顧客亦可訂造胎毛臍帶印章。
今時今日，不少新一代都有自己的抱負。貴為清朝皇室御用製筆師後人張源涂的女兒、三十歲的張璦雲本身是補習老師，為何會接手這門「老派」生意？她解釋，「因為我係大家姐，兩個妹妹又冇興趣做呢行，所以五至六年前先開始接手。」張續指，「媽咪做咗二十年，佢老啦，眼睛同精神都唔好。媽咪都講過，如果我哋都唔幫手就唔再做落去，我唔想胎毛筆手藝就咁失傳。」
年紀輕受顧客質疑
不過，即使張璦雲願意放棄教育下一代的夢想，亦不代表客人會欣然接受。「初時啲客見到我咁後生，都唔係好信我。好似要幫初生嬰兒剪頭髮，佢哋會怕我整傷嬰兒。」面對客人的質疑，張坦言，一開始時心情相當低落，不過只能坦然面對。「製造胎毛筆易學難精，惟有一邊做一邊累積經驗。」
雖然張璦雲接手生意只有數年，但從小到大受父母薰陶，對製造胎毛筆甚有心得。說起製作過程，她表現雀躍，「收集嬰兒頭髮，有一些基本要求，要二點五至三厘米長嘅頭髮，最好就係滿月嘅初生嬰兒。」原來收集頭髮過程亦有技巧，「男仔剪頭髮嘅次序係前後左右，代表帶頭領先；女仔就由後面剪到前面，代表組織家庭 。」張璦雲說起來頭頭是道。
激光刻聯與時並進
胎毛筆雖是文化遺產，不過為免被時代淘汰，亦需與時並進。張接手後，想出不少點子吸引客戶。「依家胎毛筆可以度身訂造，製作只係屬於你嘅筆。」她又指，「十幾年前只係貼街招做宣傳，依家會擺嬰兒展，亦都有設立facebook專頁。」另外亦採用新科技，「以前係用人手將對聯刻上毛筆，依家就要轉用激光技術，務求令字體更整齊。」
其實遠古時代只有皇室成員會製造胎毛筆，輾轉傳到民間。「依家客人各階層都有，由公共屋邨到山頂，明星、名人會叫助手帶嬰兒過嚟，其實都係表達父母對小朋友嘅愛。」她強調，胎毛筆與一般毛筆不一樣，主要用途不是寫書法，而是對小朋友的祝福。一般來說，都會訂一對文武筆，「代表文武雙全。」不單止亞洲人會訂造胎毛筆，原來外國人亦感興趣。張表示，「佢哋好鍾意中國傳統文化，會維持番佢哋金色頭髮嘅特色，唔會刻意染黑。」
逢星期四見刊
