政壇：民主阿婆遭翻帳累市民捱貴電費

尋日立法會人事編制小組委員會再次開會，討論環境局要求保留兩個首長級職位，以便繼續就新一份利潤管制協議同兩間電力公司談判。人民力量議員陳偉業突然爆料，指九十年代「民主阿婆」陳方安生任經濟司同兩電談判，「畀人過咗一戙」，連累市民要繳交高昂電費，但民主阿婆之後照樣可升官至政務司司長。

環境局副秘書長劉明光回應，指九十年代嘅兩電利潤管制協議，主要同財務及會計有關，因此由當時嘅經濟科負責，但依家就要考慮埋環保同可再生能源角度，因此改由環境局負責，答咗等於冇答。撥款最後獲全票通過，但連同上次會議已經傾咗成兩個幾鐘。

小組之後討論建築署建議重訂七個跨專業總建築師常額職位為指定職系職位嘅建議，有關改動唔涉及增加職位同開支，但班議員照舊係問題多多，拉布拉到完會仲未能表決。