政壇：楊偉雄爆內幕 信唔過吳得掂
施政報告預留二十億元畀創新及科技局，用投資收入資助院校進行研究，該局局長楊偉雄尋日出席網台節目時爆內幕，指特首將呢個權交畀創科局，意思係希望教育局唔使太辛苦，佢又話當局希望呢件事做得更好，如果做唔到就會「交唔到差」。
楊偉雄口響話若基金審批慢會「踢佢」。
由此觀之，莫非有人覺得教育局局長「吳得掂」吳克儉信唔過，甚至擔心會搞到一鑊泡，故有此一着？
有青年企業家喺網台節目中反映，創科局轄下多個基金審批時間太長，楊偉雄回應話創科創投基金以配對形式同私人風險投資基金共同投資，風投基金作主責審批，因對方係專家，如果審批慢，「我會幫你踢佢，冇問題」。
另外，政府公布上任兩個月局長嘅楊偉雄，尋晚啟程前往北京訪問，明日返港，行程包括拜訪科學技術部、工業和信息化部同國務院港澳辦等，由於創科局仲未有副局長，將由商務及經濟發展局局長蘇錦樑署任創科局局長。
