政壇：工聯會蹺起富貴人

其實立法會嘅小組委員會參與人數一向較少，但研究強積金對沖機制嘅小組則例外，罕有地有二十四人參與，其中工商界同勞方陣營各佔十二人，可謂勢均力敵。據知兩大陣營分別推舉富貴黨張宇人同白鴿黨「單雞」單仲偕競爭主席，而雙方各得十二票打和，搞到要靠暫時主持會議嘅工黨李卓人抽籤決定主席誰屬，最終由單雞擔任小組主席。

大部分支持工商界嘅議員喺主席結果出爐後離場，所以無參與選舉副主席，最終亦令副主席一職落入勞工界手上，由工聯會鄧家彪擔任，勞方陣營似乎先拔頭籌。

原定商界勞方分掌兩小組會

然而好戲在後頭，失落委員會主席嘅張宇人會後指斥工聯會違背承諾，佢透露早前同工聯會有協議，就係工商界同勞工界喺研究標準工時同強積金兩個小組委員會中，各自擔任一個主席。而喺上周嘅研究標準工時嘅小組委員會中，工商界已率先讓出主席位置，所以估唔到對方尋日會「過票」畀泛民，直言畀佢哋「蹺起」。

工聯會嘅陳婉嫻隨後反擊，否認同富貴黨有協議，話對方錯信中間人先有誤會，嫻姐其後仲直言，無可能將主席位置讓畀氣燄咁大嘅工商界，而「蹺起」嘅說法更係一個侮辱咁話！

至於於事件中漁人得利嘅單雞就話，前日向富貴黨鍾國斌拉票時得知有關協議，但認為協議同泛民無關，所以無理，佢又分析工聯會喺小組內只有四票，估計對方評估過勝數先作出「過票」決定。睇嚟事前協議一事各執一詞，真相係點只有佢哋至知嘞！