城中鏡：馬廖千睿教整回族焗年糕
農曆新年將至，年糕、蘿蔔糕等各式糕點已成為過年必有嘅食品，不過呢啲糕點多數係蒸嘅，港區人大代表馬豪輝太太馬廖千睿（Elaine）尋日分享一款回族特色甜品「焗椰汁年糕」，夠晒有新意。
梅韋祖蒂（左）搵到馬廖千睿（右）教大家煮過年應節佳餚。
地中海貧血兒童基金（基金）尋日搞咗個慈善烹飪班，搵到Elaine教大家煮應節佳餚，佢透露二十幾年前有回族朋友送焗椰汁年糕畀奶奶，佢食咗之後十分鍾意，所以佢就開始學整.唔少朋友食過都讚口不絕，所以佢過年至少要整二百底送畀朋友，整足三日！
梅韋祖蒂過年必煮「元寶」
基金董事梅韋祖蒂（Judy）煮嘢食都有心得，佢話過年時除咗準備應節廣東餸之外，佢必整一款叫做「元寶」嘅蛋餃，寓意盤滿缽滿。Judy話，呢款係家鄉江蘇過年時必食嘅嘢，細個時媽媽一定會準備，所以佢都將呢個習俗延續下去。
