建制及泛民喺立法會大鬥法,估唔到全港十八區區議會議事文化都有「立法會化」迹象。事關沙田區議會日前率先上演兩陣營鬥派人加入委員會,爭逐話事權,早前深水埗區議會又有泛民議員質疑主席裁決不符程序公義,話保留司法覆核權利喎,可見區議會亦非政爭淨土,沙田區議會主席何厚祥同深水埗區議會主席張永森都有排煩喇。

逼建制「冧友」保控制權

沙田區議會嘅建制派連同鄉事派有二十人,力壓泛民十九人,遇着重要議題,如個別建制派未有現身,泛民就有機會突襲成功,最新連區會轄下七個委員會都成為雙方惡鬥嘅新戰場。下周三區議會轄下七個委員會將會選主席,泛民成員全數加入所有委員會,迫使建制派同樣要「冧友」力保各委員會控制權,搞到原屬公民力量嘅何厚祥都承認,過往的確唔係每個委員會都全數議員加入,佢亦惟有鼓勵建制派議員盡可能加入委員會。

深水埗區會嘅建制派與泛民議員則係十二對十一,日前選各委員會主席時,民協區議員譚國僑不滿張永森將各個委員會主席提名截止時間,提早至開會前嘅一個半小時,批評違反《區議會條例》,不符程序公義,又話保留司法覆核權利喎,雙方喺區會惡鬥,呢個主席真係唔易做。

第一手消息請下載on.cc東網iPhone/iPad/Android/Windows Phone Apps