政壇：忘了記者安危行管會終認衰

立法會秘書處上周四接獲炸彈恐嚇電郵之後報警，警員接報到場未有發現可疑物品，不過唔好以為事件就告一段落，今次事件凸顯於突發事件嘅通報有待改善，因為據知當日立法會秘書處即時以短訊以及電郵通知一眾議員同埋議員助理外，身處大樓內嘅記者、公眾人士等全部未獲通知，唔通議員條命比其他人矜貴啲咩？

炸彈恐嚇電郵發生後數日，各方沉澱後提出改進方案，終於諗起好多時留喺立會工作嘅記者安危。立法會行政管理委員會委員陳家洛話，行管會一致同意日後發生同類事件時，會用公共廣播方式通知大樓內嘅公眾人士及記者，等大家唔需要「各安天命」，有危險時可以盡快疏散離開喎。

對於有建制派議員建議加強保安措施，包括要求所有進入大樓人士都要接受安檢，據知基於泛民議員反對，認為有關做法擾民及唔方便，暫未取得共識。