政壇：答問九唔搭八 楊偉雄要人幫
施政報告公布後，一眾問責局長都要負責解釋具體政策，立法會工商事務委員會尋日邀請了創新及科技局、政制及內地事務局，商務及經濟發展局共十八位官員出席簡報會，但人多唔代表一定勢眾，反而幾個局長齊齊甩轆，創新及科技局局長楊偉雄更被指「九唔搭八」，搞到要署級官員幫手拆彈，認真失威！
楊偉雄（左二）被譏九唔搭八。
議員劉慧卿（卿姐）質問政府會唔會首先採購香港研發成果，將研發成果商品化？楊偉雄答非所問一輪，即使委員會主席黃定光（象哥）幫手解釋議員問題內容，佢都好似唔知發生咩事，激到卿姐唉聲嘆氣，仲直指佢九唔搭八，唔知答乜！
象哥即刻幫埋手解圍，笑指佢可能係科研人才，建議由商務及經濟發展局局長蘇錦樑（Greg蘇）解答喎。但Greg蘇可能無諗過會由佢答喇，又拋個波畀坐隔籬嘅工業貿易署署長麥靖宇，搞到象哥同卿姐兩個都喺度苦笑，卿姐見到推嚟推去仲不禁講咗句「大鑊」添！
楊偉雄到最後如夢初醒，話政府喺資訊科技上已有不少努力幫助中小企，但當局主要目標係協助研發項目進軍全球市場
