政壇：劉燊濤跑渣馬 輸畀老竇
香港人愈來愈重視運動，唔少政商界名人日前不約而同參加咗馬拉松比賽，其中工業總會前主席劉展灝（Stanley）聯同長子劉燊濤（Gary）行孖咇齊跑十公里，當大家以為Gary實會跑得快過爸爸時，原來答案係相反，更顯得Stanley嘅寶刀未老！
劉燊濤透露馬拉松比賽跑得慢過爸爸。
Gary前日出席活動時憶述，當日爸爸於十公里比賽一起步就領先，最後返到終點都係追唔到佢，當時自己跑畢全程係超過一小時，由此估計，Stanley應該係一小時內完成，似乎都幾fit喎。
Gary其後代爸爸解釋「跑得之謎」，話相比自己每年只跑三、四次，Stanley每朝都會練跑，據稱Stanley本來仲想「升級」，挑戰長一倍有多、約二十一公里半馬拉松，不過全家人都阻止佢，怕佢年紀大會辛苦喎。
