鄉事派屢傳要另起爐灶打江山,近日佢哋都動作多多,上水鄉事委員會主席侯志強(侯強)尋日更搶閘,趁鄉議局舉行會議時提臨時動議,建議組黨出戰立法會選舉,連名都諗埋,叫「新界進步聯盟黨」,簡稱「新進聯」喎,唔少鄉紳拍手讚好。但原來《鄉議局條例》規定該局係法定諮詢機構,唔可以自行組黨,所以動議即被秒殺,侯強決定主動撤回。今次真係牌匾都做埋,可惜門都入唔到。

侯強發言時話,鄉議局近來面對丁屋僭建同丁權爭議等風風雨雨,好多鄉紳敢怒不敢言,但新界人唔應該任人魚肉、有冤無路訴,要有人企出嚟講吓嘢,希望從新界二十七鄉入面搵出召集人負責組黨,兵分新界東、新界西兩路參選。不過,錦田鄉委會主席鄧賀年認為,應該先交由選舉工作委員會討論,形容要由委員會「生個仔出來,由侯強接生」,佢之後仲話,有關討論連會議紀錄都唔應該落,繼「秒殺」後再「抹殺」埋侯強嘅精彩發言。但鄧賀年最後都補充番句,如果侯強自行宣布參選,佢一定會支持。

梁福元唔參選僅「抬轎」

雖然唔少鄉紳都相當期待,但派邊個勇將出征,侯強會後自言年紀大嘞,但一旦成功組黨,佢就會退出自由黨,仲呼籲其他兄弟共同進退,退出所屬政黨;十八鄉鄉委會主席梁福元都話唔會參選,表明只會幫手「抬轎」,但就要「幫到鄉事先至抬」。

鄉事派雖然想組黨,但劉業強、鄉議局副主席張學明等多個鄉紳早已加入咗唔同建制派政黨,即使想另外出戰,難度都唔細。或者,學梁福元話齋,過去大浪西灣被納入郊野公園事件、丁權爭議等,建制派都冇人肯幫鄉紳發聲,或者組黨係向建制派嘅反撲,先擺出陣式,就好似侯強先後表態話要參選北區議會主席同立法會新界東補選咁,最後咪又係吹水收場。

第一手消息請下載on.cc東網iPhone/iPad/Android/Windows Phone Apps