台灣大選剛剛結束，唔少香港人羨慕台灣有民主。之不過咁，民主係好東西，但無法包醫百病，好似食品安全問題吖，無論邊個上台都處理唔到。呢嗱嗱嗱，話口未完又嚟喇，今次係掛羊頭賣狗肉，準確啲講，係掛牛頭賣豬肉。

係咁嘅，台北衞生當局抽查發現，某知名品牌「烤茶牛肉乾」竟然同時驗出牛肉及豬肉成分，同包裝標明只含牛肉不符，擺明渾水摸魚喇。咁仲唔止，另一品牌嘅兩款漢堡肉餡一樣偷樑換柱，驗出豬肉及雞肉成分，偏偏斗零牛肉成分都冇，唔係欺騙消費者係乜喎。

聽吓台灣當局點講吖，暫時未發現生產商使用豬原料及生產雞肉，懷疑可能製造食物時未有區分生產線，出現交叉污染喎，到底係咪真係咁，仲要繼續調查至知。話時話，家陣食材價格急升，百物騰貴，尤其係牛肉，身價有升冇跌，生產商為咗減輕成本，下價貨充上品，絕對唔係冇可能嘅事。莫講話台灣吖，香港一樣曾經揭發牛丸無牛肉，證明天下烏鴉一般黑嘅咋。

嗱，咪以為事不關己，己不勞心喎，今時今日，黑心食品唔再係內地專利，兩岸毒鬥毒、黑鬥黑，香港夾喺中間，加上網購大行其道，根本無險可守，當局已經證實本港有該品牌問題牛肉乾出售嘞。講開又講，台灣呢幾年先後爆出塑化劑、毒醬油、毒澱粉、黑心鴨血、黑心豆乾、黑心豬油、有毒三文治等食安醜聞，鑊鑊新鮮鑊鑊甘，香港有邊一次唔身受其害吖？

正所謂，沒有最毒，只有更毒。今次嘅牛肉乾及漢堡肉餡事件，最多都係用平價肉充當貴價肉啫，起碼唔會食壞人，已經算有良心喇。睇番本報早前嘅專題報道吖，內地造假製毒嘅手法五花八門，層出不窮，食你唔死算好彩咋。隨便一數，已經有化學豉油、化學蠔油、重金屬海鮮、重金屬瑤柱、黑心茶葉、工業白醋、工業白酒等等，只有想不到，沒有做不到。至於牛肉乾咯喎，使乜用豬肉咁麻煩吖，化學添加劑「一滴香」搞掂晒，問你怕未。

講起就閉翳，兩岸奸商不擇手段，食安危機頻頻爆發，香港話就話有食安中心負責把關，可惜食安官僚後知後覺，甩甩漏漏，搞到黑心食品長驅直進，市民食咗落肚都唔知。家陣寒流襲港，打邊爐生意火爆，大受歡迎嘅牛肉丸，希望唔係豬肉喇，叮！