城中鏡：陳恒鑌再添丁 樂做多仔公
本身已經有個囡嘅立法會議員Ben陳恒鑌，一直想追多幾個，依家終於願望成真，佢太太又有咗喇！預產期係三月，即係應該猴年出世。至於係細佬定係細妹，阿Ben話等出世先公布。
陳恒鑌太太（中）又有咗，囡囡（左）好快可以「升呢」做家姐。（資料圖片）
阿Ben向來嚮往大家庭有幾個小朋友，但由於自己太忙，同驚養唔掂，所以搞到依家先成功爭取生多個。佢揚言未來會繼續爭取生幾個，但就同太太分歧好大，因為太太表明自己嘅愛心只有兩個，要凝聚共識有好大難度喎。
談及太太點樣調理身子，阿Ben直言唔使佢同太太諗，因為佢媽媽同外母好緊張呢啲嘢，仲大讚外母成日煲湯畀太太飲，照顧得好好，希望太太感覺良好，易啲氹掂佢再生多個！阿Ben又話即將「升呢」做家姐嘅囡囡不但冇呷醋，仲每日都幫BB改唔同嘅名，一時叫陳子恒，一時叫陳子鑌。有個「子」字喎，睇嚟都係細佬居多！
