政壇：王健林買個夠 壯大萬達有計

王健林尋日話萬達通過收購做大規模，投資海外係大勢所趨，「我們只能不斷買買買，沒有辦法！」一個「買」字都唔夠佢表達，連氣講夠三個。

睇番萬達舊年就收購咗世界鐵人公司、澳洲HOYTS院線、美國傳奇影業、仲投資西班牙馬德里體育會足球俱樂部等。幾咁「沒有辦法」下，喺海外投資咗超過150億美元（約1,170億港元）！

但佢就唔多鼓勵人哋出去掃貨。佢話內地人出國買奢侈品比重只佔15-20%，「中國沒有這個包包、錶錶還可以；（但）到國外買化妝品、奶粉、馬桶蓋等等，這就是麻煩。」仲話如果三分之一人留喺內地買日用品，就可以帶動內需。

至於佢自己買夠未？佢話：「外界說萬達就知道買買買，那我們就繼續買吧！」咁對萬科股權又有無興趣？佢只係話支持王石（萬科主席）。點支持法？佢冇講喎。