喺二○一二年進身立法會嘅Ann蔣麗芸,多次發言都惹起爭議,最新一次係尋日早上,當立法會一個委員會討論公務員五日男士侍產假嘅實施情況時,佢忽然「倒米」,拋出公務員侍產假可考慮不加反減嘅建議,即係三日就足夠,真係語不驚人誓不休,莫非佢真係唔怕一次過激嬲晒勞工界同逾十六萬公務員,波及未來嘅選戰?

張雲正斥「相當危險」

繼早前將拉布同精神病拉上關係,引起醫學界狂轟後,阿Ann尋日於立法會嘅言論,或有機會引起部分團體不滿。話說立法會公務員及資助機構員工事務委員會尋日開會,多名議員都關注公務員五日男士侍產假嘅落實情況,資料顯示有關措施由實施至今逾三年半,合共有超過一萬名公務員申領男士侍產假,阿Ann甫發言就「甩轆」,誤以為早喺一二年實施嘅公務員男士侍產假,喺舊年先落實執行。

阿Ann隨後更提出驚人建議,問及公務員侍產假日數會唔會唔需要五日,其實三日就已經足夠。公務員事務局局長張雲正即時同公務員企喺同一陣線,形容呢個屬於相當危險嘅問題,並指公務員有此需要先使用有關假期。

外界分析指出,阿Ann呢番言論相信最少激嬲兩大陣營,包括一直倡議七日男士侍產假嘅勞工界,以及逾十六萬公務員,加上阿Ann身為所屬政黨建仔嘅人力事務發言人,如果該黨唔及早作出澄清,分分鐘令人以為屬於該黨官方立場,甚至於被對手用作選戰彈藥,睇怕該黨都要諗計「撲火」,否則被炒熱先救亡就太遲嘞!

第一手消息請下載on.cc東網iPhone/iPad/Android/Windows Phone Apps