政壇：「恩」太美滿 唔使許願
眾所周知，大埔林村許願樹一直係市民祈福許願勝地，海上絲綢之路協會青年機遇委員會副主席、大律師Eunice容海恩尋日到咗林村，自爆原來係首次見到許願樹，佢笑言同真嘅許願樹無乜緣分，加上自己生活美滿，因此去到林村都無掟到寶牒。
首次見到許願樹嘅容海恩，喺樹前自拍留影。
Eunice又疑有弦外之音，話如果下次有機會掟寶牒嘅話，或者會祈求事業有新發展或突破，其實之前有傳過Eunice可能參選九月立法會選舉，莫非Eunice決定掟寶牒，就係時機成熟之時？
