外號「吳得掂」嘅教育局局長吳克儉上任三年半，外訪次數一年比一年多，畀人質疑佢外訪大過天，更被譏諷不如「搵份工周遊列國」，但佢尋日為外訪辯解時竟然仲火上加油喎。

最近政府高官前年外訪資料出爐，吳得掂外訪次數增至新高十五次，雖然外訪總開支較舊年有所減少，但咪以為佢知衰有所收斂，尋日接受電視台訪問時，被問及外界質疑外訪太多唔重視本地教育時，佢竟然反問「咩叫做多」，其後更話「外訪仲辛苦過自己喺香港裏面嘅時間」，事關外訪時要兼顧埋香港嘅事務，又死撐舊年十五次外訪，部分其實係即日來回。

跟住佢再合理化「外訪辛苦論」，聲稱要佢親自外訪，原因之一係到訪當地後，攞到嘅當地資料係全面好多，即時就攞得到咁話。佢其後疑無視有業界批評免費幼稚園教育政策「唔湯唔水」，竟聲稱如果佢唔係有就此外訪，可能呢項政策冇咁快做到︰「好多地方用十幾年做，我哋（外訪完）睇番嚟係兩年。」

曾自爆外訪當放假

佢嘅「外訪辛苦論」根本站唔住腳，一則係做得問責局長月薪近三十萬元，無論外訪或離港都應急市民所急；其次，佢過去三年外訪目的地，巧合地歐美等多個國家都輪流上榜，即使係到內地訪問，例如舊年十一月即日來回出席全國大學生課外學術科技作品競賽決賽開幕式，如果只係單純睇個活動性質，究竟有幾辛苦，答案不言而喻。

查實外界緊張外訪成效，底因係由公帑支付，仲記得佢喺一三年口快快一度自爆外訪當做放假，但如今就轉晒口風話外訪辛苦過喺香港，究竟邊句真呢？可能最真嗰句，係咪佢應該趁機諗吓，仲適唔適合喺官場死撐落去呢？

第一手消息請下載on.cc東網iPhone/iPad/Android/Windows Phone Apps