政壇：旅業內訌 富貴黨騰雞
近排旅遊業界因旅遊業議會嘅加強監管措施爆發內訌，香港旅遊從業員聯會榮譽會長林少麟仲話要搞司法覆核同千人遊行，擺明同旅議會開戰。但佢此舉就令富貴黨亂晒龍，皆因富貴黨遲遲先發現原來林少麟等兩人係富貴黨黨員，就此，富貴黨要特登出聲明撇清關係，林少麟表明，如果富貴黨唔滿意可以踢佢出黨，甚有反挑機嘅味道。
林少麟反挑機話踢佢出黨
據悉今次反旅議會嘅其中兩名核心人士，包括林少麟同旅遊促進會總幹事崔定邦都係富貴黨黨員，當中崔定邦曾代表富貴黨參選區議會選舉，但落敗後僅維持普通黨員身份，仲過檔旅遊促進會協助林少麟。
今次旅遊業內訌鬧到咁大，富貴黨都有向崔定邦表示不滿，點知崔定邦就話自己唔係富貴黨職員，今次亦非用富貴黨身份行事。而後知後覺嘅富貴黨更發現，原來林少麟都係黨員，只係一直唔活躍，區議會選舉都冇幫手。林少麟就話發起不合作運動前冇同富貴黨溝通，承認係自己疏忽，但就認為行動唔會影響黨嘅聲譽，對業界亦都有益，已經通知咗黨主席Felix鍾國斌交代初步情況，亦約對方見面，揚言如果唔滿意，可以踢佢出黨喎，但係佢自己退黨嘅可能性就較低嘞！
Felix就話當日出聲明其實係想講清楚呢啲係旅遊業界嘅事，同富貴黨無關，認為旅遊業要守規矩，唔應該零團費或冇規管。不過佢會先聽林少麟嘅解釋，同問吓立法會旅遊界議員姚思榮嘅意見，再喺黨內討論完先決定對林少麟有冇下一步行動。
講到尾富貴黨咁緊張，拿拿聲出聲明話林少麟同崔定邦純屬個人行為，唔代表該黨立場，仲表明支持旅議會加強監管等措施，同二人撇清關係，據聞皆因係立法會批發及零售界議員方剛打算交棒畀該黨副主席邵家輝，擔心林少麟同崔定邦惹嘅火頭會燒埋零售界，影響交棒啫！
