大千世界，無奇不有，連電話騙案都花樣百出，令人嘆為觀止。嗱，繼假扮內地執法部門、速遞公司呃錢後，騙徒連學生都唔放過，搞到呃補習及補課費，問你怕未。

係咁嘅，元朗區一名小二學生家長日前接獲一個電話，騙徒訛稱係學校老師，可以上門為學生補習，點知首次補習後就向家長索取幾千元費用，引起家長懷疑，拒絕付款之餘並向校方查證，結果懷疑受騙而報警求助。呢單唔係唯一個案，據講元朗區近日至少發生兩宗類似騙案，其中一名家長損失千幾元，搞到多間學校要發通告，呼籲家長提高警覺。

好明顯，騙徒正係利用家長緊張子女學業嘅心態，乘虛而入，呃得幾多得幾多。其實，呢啲手法一啲都唔高明，只要家長提高警覺，騙徒根本好難得手。正如學校話齋，校方絕對唔會舉辦收費嘅補課活動，家長只要教導子女唔好將姓名或家人聯絡電話告知陌生人，騙徒就無所施其技。當然喇，族大有乞兒，萬一真係有老師索取補習或補課費用，家長最緊要即時通知校方或報警，咁至係上上之策。

百足之蟲，死而不僵，各類騙案之所以屢禁不絕，原因好簡單，家陣嘅騙徒分工精細，組織嚴謹，唔止掌握高科技，而且識得與時並進，由隨機致電發短訊，進化到用網絡電話改號、盜取微信帳號、電話勾線等等，令人防不勝防。咁都未算呀，有啲騙徒仲精通心理學，因人施騙，有時仲會查晒家宅，甚至講得出受害人嘅暱稱添。

有數字為證㗎，去年一月至十一月，警方共接獲逾一千三百宗「假冒內地官員」電話騙案嘅舉報，當中五百幾宗為有損失嘅個案，涉及金額超過二點六億元，而且仲未包括其他騙案，都咪話唔得人驚。

其實，萬騙不離其宗，騙徒來來去去都係嗰幾招，尤其電話騙案更加耳熟能詳，傳媒早就廣為報道，警方亦苦口婆心不斷宣傳，點知仍不斷有市民中招，只能夠話自己太傻太天真。俗語話，「光棍佬教仔，便宜莫貪」，只要大家打醒十二分精神，唔好諗住貪小便宜，騙徒自然無機可乘。

當然喇，打擊騙案始終要靠執法部門，中港台三地警方去年展開跨國追捕，遠赴印尼拘捕幾百名大陸及台灣騙徒，總算令電話騙案有所收斂。家陣最緊要係乘勝追擊，唔好令香港淪為騙案之都，叮！