政壇：搞搞政：創業無天使 學者難「立」足
創新及科技局剛成立，今年施政報告亦都喺創新科技方面重點落墨，淨係資助大學研究同埋成立創科創投基金方面，就投入超過四十億元。其實，搵投資者投資初創行業先至係最困難嘅事，就連港科院院長徐立之都話，自己曾經幾次創業都唔成功，仲自嘲︰「教授做生意都唔係點得。」好明顯，徐立之都反省過學者「離地」呢個弊病。
徐立之尋日出席一個青年網台節目，同幾位喺創科業發展嘅後生仔交流意見。其中一位做應用程式嘅後生仔講到喺香港搵投資者特別辛苦，香港文化又怕失敗，一次失敗就會被「打入冷宮」，大嘆創業艱難。徐立之跟住自爆，原來佢喺加拿大時，都試過想自己創業，寫過幾份計劃書，點知最終連「Angel」（天使投資者）都搵唔到。佢嘅經驗係，教授做生意都唔係點得，因為教授做嘢實係想做到完美先上市場，但市場唔會等你。佢仲話，做科技出身嘅人，就要搵啲做生意嘅人幫手。
至於今次施政報告咁支持科技業，徐立之話係個好開始，不過佢仲希望政府嘅審批制度可以完善啲，同埋審批過程可以快番一啲咁話。
