政壇：鄉局雙「強」 隨時出招
立法會新界東補選嘅提名期聽日結束，每逢選舉都要幫建制派「抬轎」嘅鄉議局，至今仲未表態係咪支持已報名參選嘅建仔副主席周浩鼎。外界一直盛傳上水鄉事委員會主席「侯強」侯志強有意參選，適逢東方報業集團前日獨家直擊侯強密會富貴黨榮譽主席田北俊，其後侯亦承認會面係商量退黨事宜，令人揣測佢計劃打正旗號幫鄉議局出選。不過，鄉議局主席劉業強尋日就話，侯志強夠勇，鄉議局派唔派員都好，「佢都會跑」，咁講，似乎「雙強」已練好拳，隨時可以出招！
劉業強尋日出席活動講起侯強退出富貴黨一事，佢讚侯志強係一匹勇馬，仲話「派唔派馬出去，佢都會跑」，言談間講到好似由對方自行決定出選與否咁，呢個係咪鄉事派對建制派嘅新姿態呢？劉業強只話，知道侯對補選好有興趣，加上做唔成區議會正、副主席，自然想喺另一方面發展，但參選始終事關重大，所以仲勸緊對方。問到係咪支持周浩鼎，佢話依家仲有時間，實會支持建制，但就要睇吓侯有咩決定。
議會須有人維新界權益
依家已經有最少七個人報名參加新界東嘅補選，當中有建制、泛民、激進同溫和派，鄉議局遲遲未表態，不過，隨着提名期結束，局勢亦好快明朗化。
咁鄉議局係咪組緊「新界黨」呢？劉業強話，無論組唔組黨都會支持自己人參選，事關政黨喺議會只識講道理，搞到外界同政府部門都唔係咁清楚新界傳統權益，所以一定要有人喺議會發聲。佢又話，明白建制會擔心搶票問題，但認為仲有好多人未出嚟投票。雖然講到實牙實齒咁，但佢話仲有好多嘢未諗掂，組黨一事睇嚟真係要拭目以待。
