八十年代越南難民投奔怒海，源源不絕湧來香港，「北漏洞拉」成為港人嘅集體回憶。估唔到事隔幾十年，歷史居然重演，假難民唔止愈來愈多，而且來自四面八方，除咗南亞、東南亞及非洲，連阿富汗人蛇都有，問你怕未。

呢，警方日前喺大嶼山拘捕九名外籍人蛇，其中七人來自南亞，另外兩人來自阿富汗。佢哋供稱持旅遊簽證先飛到廣州，再通過「蛇頭」安排搭船偷渡來港，只係想打黑工賺錢喎。

即係咁，假難民問題已經困擾香港多年，人蛇偷渡來港一啲都唔出奇，但今次居然包括阿富汗人，咁就唔同講法喇。係人都知，阿富汗係九反之地，唔止戰亂不斷，恐怖活動更加無日無之。以前阿富汗難民多數湧往歐洲，今次偷渡來港，究竟有乜企圖呢？只係打黑工賺錢咁簡單？正如有人話齋，香港一向自認係安全地區，恐怖襲擊嘅機會唔大，警覺性唔高，萬一有極端分子扮成難民混入，咁就大件事嘞。

唔係危言聳聽㗎，今次有阿富汗人蛇，可能好快就有伊拉克人蛇、敍利亞人蛇，甚至有伊斯蘭國恐怖分子添。唔好以為香港距離恐怖襲擊好遙遠，日前印尼雅加達受到連串恐襲，就係懷疑由伊斯蘭國恐怖分子策動，香港作為國際金融中心，而且係中國嘅門戶，唔係冇可能成為下個目標㗎。

講到底，難民問題愈演愈烈，皆因港府中門大開，來者不拒。如果係基於人道立場，救濟真正難民無可厚非，問題係，九成九以上提出免遣返聲請嘅人士都係假難民，佢哋來港目的只係為咗搵快錢，有啲打黑工，有啲作奸犯科，有啲甚至成為本地黑幫嘅打手，從事販毒、貼街招抹黑勒索等不法活動，搞到香港烏煙瘴氣，七國咁亂。

面對呢個亂局，港府一直視而不見，直至東方報業集團發揮第四權監督功能，代市民發聲，為政府把脈，連環踢爆假難民禍港亂象，施政報告先至肯正視問題，承諾全面檢討相關政策，修改法例堵塞漏洞，而且唔排除退出聯合國《禁止酷刑公約》。所以話，港產官僚係四方木，唔踢唔郁。

無論點都好，當局終於肯踏出撥亂反正嘅第一步，雖然慢咗幾拍，但遲到總好過冇到。隨着阿富汗人蛇殺到，港府固然要打醒十二分精神，市民同樣要保持警覺，以免香港淪為恐怖分子樂園吖，叮！