城中鏡：密會退黨
外界一直盛傳上水鄉事委員會主席「侯強」侯志強有意退出富貴黨，以便日後聯合新界鄉議局其他鄉紳合組成「新界黨」，但退黨一事講了半年，都是只聞樓梯響。不過，尋日上午，我哋就直擊侯強密會富貴黨榮譽主席「田少」田北俊，談論退黨一事，席間更出現疑似退黨信文件。莫非「新界黨」組黨一事，已經獲有關方面「祝福」，所以侯強急急退黨？
侯志強（左）亦約咗黎少棠會面。
侯志強（左）及黎少棠（右）座位背向門口，與田北俊密斟。
田北俊（圖）同侯志強邊飲咖啡，邊討論退黨問題。
提早放風 睇兩家誠意
尋日上午十一時三十五分左右，我哋喺金鐘中信大廈一間咖啡店，目擊田少同侯強一齊步進，佢哋先喺門口選購食品同咖啡，然後入內會合提早去搵位嘅前葵青區議員黎少棠。不過，田少與侯強似乎嫌原先張枱嘅位置太當眼，選擇轉到最角落、較為隱蔽嘅一張枱坐低，然後就開始「密密斟」，期間，黎少棠在袋中拿出幾份文件，田少與侯強就認真傳閱。會面約一小時後，田少急步先行離開，而侯強與黎少棠一會兒後先步出咖啡店。
究竟侯強有咩同田少共商嘅大計呢？侯強透露只係討論退黨事宜，佢已向田少表明，一旦鄉議局成功組成「新界黨」，佢就會退出自由黨。至於田少有無挽留？侯強指田少表示尊重，但重申自己目前仍然是黨員，與田少亦保持好朋友關係。佢又透露，昨日下午五時亦相約了鄉議局主席劉業強討論組黨一事，並會在下周二（十九日）鄉議局大會上討論。
有政壇中人指，侯強在新界東地區影響力不容忽視，富貴黨可能要靠佢嘅票源才可在九月立法會選舉力保唯一嘅新界東直選議席，所以侯強喺新界黨組成之前，實行一石二鳥，提早向田少講定退黨嘅意願，睇田少會否挽留及對自己有多大誠意，同時看看鄉議局對佢是否同樣重視。故事發展，相信最快下周二揭曉。
