政壇：吳得掂拋書包 專家高分讚好
教育局局長「吳得掂」吳克儉尋日為一個中學生徵文比賽頒獎典禮做主禮嘉賓，佢喺致詞時無啦啦拋書包，背誦咗兩首詩，分別係李白嘅《靜夜思》及賀知章嘅《回鄉偶書》。同場嘅粵語正音專家何文匯教授就讚吳得掂讀得好，聽落有感情，以十分為滿分，何教授就話畀八、九分。其實呢兩首詩都係小學程度，吳得掂貴為局長，無理由攞唔到滿分囉。
吳克儉背《靜夜思》及《回鄉偶書》，何文匯畀八、九分。
咁何教授覺得吳得掂仲有咩要改進呢？佢就話睇唔到吳得掂有咩唔好，但係就講到明唔會畀滿分喎。何又話，其實《回鄉偶書》入面第二句「鄉音無改鬢毛催」個「催」字，好多人都讀做「衰」音，連個字都寫錯成「衰」字。何教授就讚吳得掂讀啱咗，但就話吳得掂冇可能會讀錯喎。
個徵文比賽題目係「我的籍貫」，吳得掂話鄉土情懷同尋根都係中國文學作品常見嘅主題，所以就引用咗《靜夜思》及《回鄉偶書》做例子。
