政壇：馮隆春撐渣馬 千里趕返落場
渣打馬拉松聽日殺到，今年天氣凍兼可能落雨，參加者嘅挑戰真係唔小。其實，有份落場跑嘅，仲有一班銀行高層，因為賽事設有一場「領袖盃」，落場嘅每位都係渣打銀行嘅高層，渣打大中華及北亞地區行政總裁洪丕正唔少得，連派去外地嘅高層都要不遠千里飛返嚟落場添。
洪丕正（紅箭嘴示）與馮隆春（藍箭嘴示）往年都喺領袖盃中落場。
聽講渣打一班中港台CEO都會跑埋一份，至於專程歸來嘅就有渣打前CFO馮隆春，佢之前就調咗去印尼，依家係渣打旗下印尼Permata銀行副總裁，為咗參加賽程為二公里嘅「領袖盃」，馮隆春要由印尼飛行3,263公里返嚟香港，真係誠意十足呀。
其實，洪丕正同馮隆春都跑開嘅，兩公里冇難度喇。
