政壇：小米大鬧天宮 雷軍「不開心」

嘩，做咗一年，老頂竟然唔開心？為乜呢？員工心裏十五、十六之際，雷軍揭曉，原來小米舊年嘅賣機量未達佢嘅理想，全年出貨量達唔到八千萬部嘅目標，所以雷軍咪唔開心囉，不過，佢都講明，今年嘅戰略係「開心就好」，仲叫所有手足放低晒啲表現指標包袱，咁樣，全場先鬆一口氣。

不過，睇雷軍喺年會上嘅表現，經常笑容滿面，同嘉賓傾得唔知幾開心，睇怕佢上面嗰啲話都係鼓勵士氣。其實，小米手機舊年嘅銷情畀各方狙擊，全年出貨量都超過七千萬部，可以話係完勝內地同行喇，應該開香檳慶祝。展望未來一年，雷軍又話會搞小米探索實驗室，研究進軍VR（虛擬現實技術）與機械人領域。