政壇：謝偉銓嫁女 立會派蛋糕
立法會尋日有內會同財會，又係議員集體現身嘅時候，只見建築、測量及都市規劃界議員謝偉銓一直笑瞇瞇，仲喺議會派蛋糕當嫁女餅，原來佢嘅愛女今日出嫁，榮升外父嘅佢，咪同大家分享喜悅囉。
謝偉銓
謝偉銓尋日喺立法會派蛋糕賀女兒出嫁。
謝偉銓好有心，送上三打色彩繽紛嘅杯子蛋糕，啲蛋糕望上去夠晒靚，但大家都覺得味道太甜，唔通蛋糕盡顯外父心？問到個女嘅婚事，謝偉銓透露，今日會擺嫁女酒，但只會招呼親友，明日就會喺酒店以雞尾酒會招待同事。咁佢送乜嘢畀愛女呢？佢笑笑口話係傳統嘢，其後又話只係出錢，任由愛女鍾意乜嘢就買乜嘢！
