特首梁振英上月底委任中文大學前校長李國章做港大新任校委會主席，引來港大學生嘩然，有學生就喺網上號召罷課行動，仲喺星期一舉行了第一次罷課大會，選出大罷課委員會成員。據知，學聯前常委梁麗幗同前學苑副總編王俊杰係今次罷課行動發起人，選舉罷委時，兩人都成功當選，而學聯前秘書長周永康亦獲選為罷委，唔通一眾前學生領袖希望藉今次罷課，借屍還魂？

當晚醞釀罷課大會，約有一百五十位同學出席，其中包括曾經在facebook信誓旦旦，表明不會搞罷課的學生會會長馮敬恩。會議過程非常神秘，學生不單阻止傳媒採訪，更加用膠袋遮掩窗戶，好似有乜不可告人嘅秘密咁。佢哋最後宣布有十五位同學包括梁麗幗、王俊杰、周永康及本土民主前線成員梁天琦獲選為罷課委員會成員，並會於明日（十七日）舉行第二次罷課大會。

提3大目標 擬絕食抗爭

據知，當晚通過了罷課臨時憲章，提出三大目標，包括要求廢除特首校監必然制、取消特首委任校委等，佢哋會要求李國章在本月二十二日前召開臨時校委會討論以上問題，如果李國章不同意，佢哋就會在下次校委會開會時採取行動。罷課日暫定在本月二十日開始，本月二十三日會有全民大會，並計劃二十四日開始展開絕食行動，但一切行動，都有待第二次罷課大會中落實。

雖然看似計劃周詳，罷委會成員又有搞罷課經驗，但有其他學界成員就對成功罷課吹淡風，有人說：「九．二二罷課嗰陣，用了幾個月時間醞釀，開會都開過唔知幾多次，今次太過倉卒，加上校內學生反應唔熱烈，估計唔會好多人參與。」其實過去大學生罷課，都由學聯主辦，今次無其他院校支持，港大就算搵到前學聯成員助陣，都未必容易成功，再加上李國章登位已成定局，學生仲可以玩得出咩花樣？

第一手消息請下載on.cc東網iPhone/iPad/Android/Windows Phone Apps