城中鏡：姚珏小時候邊喊邊拉琴
近年興起街頭快閃演出，著名小提琴家姚珏早前亦首次一嘗街頭演出經驗，佢話膽係練番嚟，記得童年時表演亦會膽怯，家中每逢周日就會有人嚟作客，父親都會要求佢表演。佢話最初好唔願意，邊喊邊拉奏，後來卻逐漸享受，到首次真正踏上舞台已毫不畏懼，認定「舞台是我家」。
姚珏創辦嘅香港弦樂團獲馬會資助讓二百多名學生免費學小提琴。
早前姚珏為香港弦樂團的《賽馬會音樂能量計劃》揭幕並演出，該計劃獲馬會資助，為二百四十位低收入家庭學生提供三年免費小提琴課程。身兼樂團創辦人嘅姚珏話會同多間小學合作，挑選有天分而無經濟能力嘅學生，讓佢哋可有機會發揮天分，預計本月底至下月初可正式開始課程，由樂團內成員負責教授，每位學生更會獲贈一支小提琴。
姚珏話好少機構可同時提供免費學習樂器同演出嘅機會，佢認為舞台先係學生真正成長嘅地方。
