城中鏡：女童軍全年Fun

總會今年特別搵咗「新血」加入幫手，包括擔任名譽副會長嘅百仁基金副主席陳寧寧同Anthea羅詠詩。早前兩人齊齊出席總會周年慶典啟動禮亮相，喺女童軍香港總監李周美枝、前總監李張慧美同孫鍾小芬等資深前輩帶領下，推動一系列活動同大計。

陳寧寧大讚制服靚

Anthea話讀書時一直係文靜派，甚少運動或參加制服團體，反而佢老公做過童軍，所以成日被老公笑佢點解細個性格咁悶，依家佢就要參加多啲活動畀老公睇，今次係孫鍾小芬介紹佢入會嘅。Anthea仲話多咗參與社會服務後，感受到唔同團隊嘅凝聚力，好享受同樂在其中。

講起套制服，首次加入制服團體嘅陳寧寧大讚套制服又靚又整齊。在場見名譽副會長郭詩慧套制服同其他女士唔同，原來佢哋有兩款制服，一款係外套同短裙套裝，另一款係質料較薄嘅連身裙，方便配合唔同天氣穿着。

咪以為女童軍總會只得女士，其實亦有唔少男士支持女童軍，好似當日都有到場嘅名譽副會長彭穎生、陳明耀同王嘉恩等人。彭穎生同陳明耀亦分別喺唔同地方分會服務好多年，相當難得。