政壇：搞搞政：施政報告無料 工聯會玩不滿

前日工聯會喺回應施政報告嘅記者會上，一眾議員齊齊企足兩分幾鐘，由「阿王」王國興做代表發表幾句意見，好有氣勢話對施政報告感到「非常失望，非常不滿」。聲明一讀完，阿王話：「係咁多喇，唔該晒！」之後就拉隊離開。記者其後追問他會否反對施政報告致謝動議，佢只回應：「我哋會研究」。

到尋日特首答問大會，只有陳婉嫻、阿王、麥美娟同鄧家彪在場，KK黃國健同郭偉強就缺席。據稱郭偉強因要到北京交流而未能現身，但KK身在港都無出席，佢解釋因有其他事撞時間而缺席，但佢否認係杯葛答問大會，因大家都係按自己嘅時間表而決定係咪出席。

致謝動議要研究

阿王喺答問大會後仲發炮，指當年支持特首上任，係因特首承諾會將勞工權益放落政綱，佢揚言會全力追數，最低限度希望可縮減強積金對沖比例。被問到係咪喺施政報告致謝動議時投反對票，佢稱要再研究，但唔排除任何可能性。

工聯會表面看似「係威係勢」，但最後會唔會「縮沙」實在好難講，因為「縮沙」已非首次發生，唔知今次會唔會又係虎頭蛇尾，最後耳仔軟又支持施政報告致謝動議呢？有工聯會中人憤言，施政報告對勞工界無到，若今次唔反對致謝動議，九月選舉必定無運行，就算最後不敢投反對票，都要投棄權票以示不滿。