台灣嘅總統大選臨近，好多人都會組團赴台觀戰，立法會議員梁美芬所屬嘅西九新動力亦搞咗個為期四日嘅觀選團，尋日一大棚人出發前，喺機場影咗張大合照，我哋就發現同屬沙田區議員嘅公民力量潘國山（左二）同龐愛蘭（左四）亦有隨團出發。龐愛蘭加入公民力量前係新世紀論壇成員，早前曾經傳出佢有意加入富貴黨，但最終都傾唔埋欄，唔通今次佢藉觀選為名，密謀再轉會去西九新動力？不過，無論點都好，相信大家都有個共同目的，就係湊熱鬧一齊去睇吓人哋啲選舉偷吓師啫！
